Fuimos carroña pa una fame
que nun amenazó hasta lo último.
Quedómos el fuelgu mínimu pa tentar algamalos.
Corrieron camín de la playa esbabayando espluma y cunetes,
hemorraxes de la escuridá qu´espardieron sangre perende,
pulsos d´un corazón d´otros,
animal.
Semeya: Oeste / Rd´A
Los díes nos que muerro de los años nos que nun ñací, igüen 24h de redundancia de la Nada.
Semeya: Esborriar / Rd´A
Atardez.
La cera espurre, como´l que desendoca un pañu puercu, la mio solombra. Algama dellos cuerpos, ye alta, espigada. Abanga´l pescuezu, paez mirame.
Siempres caminó conmigo
la solombra del flacu.
Semeya: Xelu / Rd´A
Llueven Perseides y yo alcuérdome de la bedul qu´había detrás de mio casa, altísima, que pasaba perriba del restu de los árboles, como teniendo poles nubes.
Baltóla mio padre va cásique siete años.
Muncho tardó´l cielu en cayer.
Semeya: Palacios / Rd´A
El malvís deprendió a sonsañar a Roy Orbison y paeció
que la mañana durara 28 años y los sos muertos.
Tiraba l´aire na pación
como si quixeren cariciar el pubis de la tierra.
Vi ñubes engarrase nel barniz de dellos güeyos
y quixi llorar pa saber qué se sintía.
Sonó California Blue cuando´l sol se suicidó.
El duce fiyu de Gretel
dilióse nos charcos.
Semeya: Acotación / Rd´A
En dalgúna hora los relós espeyaron a los malditos.
Falemos de les cais onde la cantariella fuma de nueche, la tele foi un mediu de tresporte. D´autores que namás sabíemos pronunciar y tópicos. Denotaciones eterees de lo poco que lleéramos. De munchos nomes, toos de muyer, toes la mesma. L´alcohol tien daqué qu´aformiga los callos de los deos. Escribir, escribir muncho, ver materia lliterario na parte más blanca sol raigañu de la pación -too, pa dicir del color verde, namás, clorofila nes víes respiratories-.
L´añu qu´incineremos a mio güela, mio güelu, el mio hermanu y yo fuimos xuntos al Gurguyu, a quemar la yerba seco. La caber febra de fumo alzóse yá col sol calistrando l´horizonte.
Nel teatru de Shijiazhuang, les engurries de mio güela faen solombres pequeñes, silencioses. 
Nun abras la puerte, que marchen el calor y los gatos, mesma cosa. Que los calabres de los tigres pasen fríu na antoxana.
Hai daqué de reptil que quier cambiar nesti follar contigo tan asina. Como frotase muncho fuerte pa mudar el piel. 
La memoria y el camín sincronizáronse permal ¿qué dios mediocre nos diseñó asina ensin damos el regalu d´arremanamos curioso p´andar marcha atrás?
Perdona si te dexo cola pallabra na boca, como esbabayase de silenciu.
Yo quería ser l´amante de la baillarina de la caxa de música; cola mano espurrida al cielu, xuro que me llamó. La porzolana enseñóme la piel más frío que conocí, caricié-y la cara, xuxurié amor, qué te pasó. Sele xiró música de Tchaikovski y enseñó la espalda más fría que conocí.
Una vez escribí que diba ser quien a matate, coses del despechu. Güei, coses del destiempu, escribo les caberes pallabres que van por ti:
Falar d´amor namás ye pa los creyentes, caparines nel estómadu. Pa la parte d´acá de la llende falamos de platelmintos nel intestín, amase invertebrao. Yo nun soi pa date alimentu que nos faiga espoxigar.
Siempres salgo del mesmu chigre, a la mesma hora y veo / d´espaldes / tarde / yá pasó, a la mesma moza de pelo llargo. Tien suerte, si se demorare unos segundos en pasar, namorábame d´ella.
A diario ver pasar fierro, como´l que conoz la casa, nun se m´ocurre material más desemeyáu de la piel. Munches veces esforgué(mos) les rodíes polo mínimo y, poniéndomos serios, nunca enxamás saltaron chispes.Semeya: Cañiqueros / P. Peruyero
De la que tábemos velando a mio güelu, dixo mio güela: probín, con tolo que trabayó tola vida... pero claro, la tierra ye mui sacrificao, fiyu.
Lo primero qu´escaecí
Los pexes suañen cola tierra, clisen mirando pa ella. En branu, nos paseos de les playes, piensen que qué guapo la tierra, que nun tien fronteres.
