09 de febreru 2011

Cuando prometí dexar de falar de Danae
pinté
de blanco les parés.
Pela nueche
los cocos de lluz dibuxaron tetos roxos
na solombra del mundu.

Semeya: Danae / Rd´A

18 d´avientu 2010

Suicidóse la nueche y los perros mordíeronmos la vida.

Fuimos carroña pa una fame

que nun amenazó hasta lo último.

Quedómos el fuelgu mínimu pa tentar algamalos.
Corrieron camín de la playa esbabayando espluma y cunetes,
hemorraxes de la escuridá qu´espardieron sangre perende,

pulsos d´un corazón d´otros,

animal.

Somos unos bípedos desgraciaos,
demasiao altos.
Nel cantil alboreció a traición, el sol pela espalda
y cayómos la solombra al mar.

Semeya: Oeste / Rd´A

11 d´avientu 2010

Los díes nos que muerro de los años nos que nun ñací, igüen 24h de redundancia de la Nada.

Semeya: Esborriar / Rd´A

10 d´avientu 2010

Atardez.

La cera espurre, como´l que desendoca un pañu puercu, la mio solombra. Algama dellos cuerpos, ye alta, espigada. Abanga´l pescuezu, paez mirame.

Siempres caminó conmigo

la solombra del flacu.

Semeya: Xelu / Rd´A

6 d´avientu 2010

Llueven Perseides y yo alcuérdome de la bedul qu´había detrás de mio casa, altísima, que pasaba perriba del restu de los árboles, como teniendo poles nubes.

Baltóla mio padre va cásique siete años.

Muncho tardó´l cielu en cayer.

Semeya: Palacios / Rd´A

1 d´avientu 2010

El malvís deprendió a sonsañar a Roy Orbison y paeció

que la mañana durara 28 años y los sos muertos.

Tiraba l´aire na pación

como si quixeren cariciar el pubis de la tierra.

Vi ñubes engarrase nel barniz de dellos güeyos

y quixi llorar pa saber qué se sintía.

Sonó California Blue cuando´l sol se suicidó.

El duce fiyu de Gretel

dilióse nos charcos.

Semeya: Acotación / Rd´A

16 de xunu 2010

En dalgúna hora los relós espeyaron a los malditos.

Fuimos la güelga de les sorrises,
el contramolde de les sepultures.
Les madrugaes trixeron agua mui fino en focicu,
y acorralaron les solombres na piel plegada.

La redención nes boqueres.

Semeya: Güesu / Rd´A